यथास्थितिलय् म्याद थप असम्भव : माओवादी
एकीकृत नेकपा (माओवादीं) यथास्थितिलय् संविधानसभाया म्याद थप यायेमफइगु निर्णय याःगु दु । संविधानसभाया म्याद थप यायेगु व मयायेगु बारे निर्णय यायेत बिहीवाः न्हिनय् च्वंगु माओवादी स्थायी समिति बैठकं शान्ति व संविधानया सुनिश्चितता मजुइकं संविधानसभाया म्याद थप यायेमफइगु निर्णय याःगु खः ।
माओवादी मू ज्याकू कोटेश्वर पेरिस डाँडाय् च्वंगु बैठकय् वर्तमान सरकारं राजीनामा बियाः राष्ट्रिय सहमतिया सरकार गठन जुसाः जक संविधानसभाया म्याद थप यायेगु निर्णय या:गु दु । बैठकं वर्तमान सरकार शान्ति व संविधानया निंतिं बाधक जूगु धासें थ्वहे अवस्थाय् म्याद थपे यायेगुया औचित्य मदुगु निर्णय याःगु दु ।
बैठक लिपा पार्टी प्रवक्ता दिनानाथ शर्मां थ्वहे अवस्थाय् वार्ताया औचित्य लगभग समाप्त जूगु कनादिसें बिहीवाः च्वनीगु धाःगु स्वंगू दलया बैठक जुइगु सम्भावना तसकं म्हो जूगु धयादिल । वय्कलं बैठकं संविधानसभा विघटन जुसाः उकीया जिम्मा सरकारं कायेमाःगु ठहर याःगु धयादिल । वय्कलं थ्व सरकारं राजीनामा ब्यूसा: नेतृत्व याइगु पार्टी व नेताया बारे सहलह यायेफइगु धयादिल ।
अथेहे बैठकं विपि कोइराला मेमोरियल क्यान्सर अस्पतालया कार्यकारी निर्देशक डा. भक्तमान श्रेष्ठया अपहरणया छानबिन यायेगु निंतिं स्थायी समिति दुजः नापं सभासद् अमिक शेरचनया संयोजकत्वय् सभासद् चित्रबहादुर श्रेष्ठ व अधिवक्ता धर्म आचार्य दुथ्याःगु छानबिन समिति गठन याःगु दु ।
