माओवादीं क्रान्ति यायेत स्वयाच्वंगु मन्त्री श्रेष्ठया द्वपं
समान्य प्रशासनमन्त्री रविन्द्र श्रेष्ठं माओवादीं संविधानसभाया म्याद थप याये चाहे मजूगु द्वपं बियादीगु दु । वय्कलं माओवादीं संविधानसभा पाखें संविधान निर्माण यायेगु पलेसाः क्रान्ति यायेत स्वयाच्वंगु धयादिल । वय्कलं यदि माओवादीं शान्ति चाहे मजुगु खःसा क्रान्ति यायेत जंगल वनेत हाथ्या बियादिल ।
विहीवाः आस्था महिला विद्यालयं ख्वपय् ग्वसा:ग्व:गु छगू ज्याझ्वलय् न्ववानादिसें वय्कलं प्रचण्ड सुविधा सम्मन्नताया ल्यूने वंगु धयादिसें यदि प्रचण्डं क्रान्तिया लँपु त्वःतुगु खःसा शान्तिया निंतिं संविधानया म्याद थपे यायेत तयार जुइमाःगु धयादिल । वय्कलं प्रचण्ड थःगु गरु व नेता नं जूगु तर प्रचण्डया बिचाः निथि जूगु धयादिसें प्रचण्डया बिचाः क्रान्ति वा शान्ति छु खः प्रष्ट मजूगु द्वपं बियादिल ।
माओवादीं बिना शर्त संविधानसभाया म्याद थप यायेगु पलेसाः शर्त जक अप्वयेकूगु धयादिसें मन्त्री श्रेष्ठं शान्ति व संविधानया निंतिं थः पद त्याग यायेत तयार जूगु धयादिल । वय्कलं दलत दथुइ सहमति जुसाः प्रधानमन्त्री व मन्त्रीत नं पद त्वःतेत तयार दुगु धयादिल ।
