प्रधानमन्त्रीं छुं नं शर्त स्वीकार मयाइगु
प्रधानमन्त्री माधवकुमार नेपालं संविधानसभाया म्याद थपया निंतिं छुं नं शर्त स्वीकार मजुइगु खँ धायदीगु दु ।
बिहीवाः बेलायतया अन्तर्राष्ट्रिय विकास राज्यमन्त्री आलम डंकननापया खँल्हाबंलाय् प्रधानमन्त्री नेपालं लोकतन्त्रय् हिंसा, बलप्रयोग व जबर्जस्ती स्वीकार्य मजुइगु धयादिसें लोकतन्त्रया आधारभूत मूल्य, मान्यता व विधियात दक्वसिनं सम्मान यायेमाःगु धयादिल ।
वय्कलं नेपाःया राजनीतिक असहमतिया कारणं निर्धारित इलय् संविधान निर्माण जुइमफुगुलिं आः दलत दथुइ सहमति कायम यानाः न्ह्याः वनेमाःगु खँय् बः बियादिल ।
प्रधानमन्त्री निवास बालुवाटारय् जूगु खँल्हाबंलाय् बेलायती राज्यमन्त्री डंकनं बेलायत व नेपाः दथुइ ताः ई न्ह्यः निसें दुगु स्वापूया बारे चर्चा यानादिसें बेलायतं नेपाःया विकासयात महत्व ब्यूलिं न्हूगु सरकार गठन जुइवं हे थःम्हं न्हापांगु भ्रमण नेपालय् यानाःगु धयादिल ।
वय्कलं बेलायतं नेपालय् शान्ति स्थापना व न्हूगु संविधान निर्माण जुयाः राजनीतिक स्थिरता कायम जूगु स्वये चाहे जूगु धयादिसें उगु ज्याय् नेपाःया राजनीतिक दलत सक्षम जुइगु विश्वास प्वंकादिल ।
