स्वनिगलय् थनिंनिसें सुझाव संकलन
न्हूगु संविधानय् दुथ्याकेमाःगु सुझाव कायेत थनिंनिसें सभासदतय् पुचः थीथी थासय् वइगु जूगु दु । स्वनिगलय् सुझाव कायेत न्यागू पुचलय् विभाजन यानाः ज्या न्ह्याकीगु खँ कांग्रेसया सभासद् नविन्द्रराज जोशीं कनादीगु दु । वयकलं कनादी कथं न्यागुलिं पुचः स्वनिगःया फुक्कं जिल्लाय् वनाः सुझाव संकलन यायेगु ज्या याइ ।'जिमिसं न्ह्यसःपतिइ जक केन्द्रित जुयाः सुझाव कायेगु मखु खुल्ला हिसाबं र्सवसाधारण नागरिक समाजया राय सुझाव कायेगु जुइ ।' भाजु जोशीं धयादिल ।
संविधान निर्माण प्रक्रियाय् फयांफछि अप्वः जनतायात दुथ्याकेगु उद्देश्यं सभासद्तय् पुचः दयेकाः जिल्ला जिल्लाय् छ्वःगु खः । फुक्कं जनताया छेँय् छेँय् वनाः सुझाव कायेगु सम्भव मदुगुलिं पुचलं थीथी थासय् गोष्ठी व अन्तक्रिर्या यानाः नं सुझाव कायेगु तयारी जुयाच्वंगु जानकारी नं वय्कलं बियादिल ।
स्वनिगलय् सुझाव काइगु पुचलय् कांग्रेसया सभापति गिरिजाप्रसाद कोइराला, नेमकिपाया अध्यक्ष नारायणमान बिजुक्छेँ, नेकपा मालेया अध्यक्ष सीपी मैनाली, माआवादी नेता वर्षान पुन नापं २९ म्ह सभासद् दुथ्याः ।
