बैठक निष्कर्षविहीन / बैठकय् प्रधानमन्त्री अनुपस्थित
संविधानसभाया म्याद थपया विषयलय् राष्ट्रिय सहमति देयेकेत बुधवाः निक्वःगु खुसीइ च्वंगु स्वंगू दलया शीर्ष नेतातय् बैठक निष्कर्षविहीन जुयाः क्वचाःगु दु । बैठकय् निगूलिं पक्षं थःथःगु हे पुलांगु अडान कायम या:गुलिं बैठक निष्कर्षविहीन जूगु खँ धाःगु दु ।
संविधानसभा भवनय् प्रधानमन्त्री सहित स्वंगू दलया शीर्ष नेतातय् बैठक च्वनेगु धाःगु खःसां प्रधानमन्त्री नेपाल उपस्थित जुयामदी । बुधवाः सुथय् च्वंगु बैठकय् प्रधानमन्त्रीं सहलह व गृहकार्य यायेत ई फ्वंगुलिं हानं सनिलय् बैठक च्वंगु खः ।
माओवादी उपाध्यक्ष नारायाणकाजी श्रेष्ठ 'प्रकाशं' बैठकय् थःपिं गम्भीर जुयाः वःसां लिप्पांगु घटनाक्रमं संविधानसभा विघटन यायेगु षड्यन्त्र जुयाच्वंगुलिं थःपिं तसकं चिन्तित जूगु कनादिल । नापं वय्कलं देय् अत्यन्त गम्भीर मोडय् थ्यंगुलिं थुकीयात बचे यायेत दक्वं तह पाखें सशक्त दबाव बीत इनाप यानादिल ।
कांग्रेस प्रवक्ता अर्जुननरसिंह केसीं थःपिंसं संविधानसभाया म्याद व प्रधानमन्त्रीया राजीनामायात स्वानाः मस्वयेत इनाप यानाःगु धयादिसें प्याकेजय् सहमति जुसाः प्रधानमन्त्रीं राजीनामा बिफइगु धयादिल । तर माओवादी सहमतिया निंतिं गम्भीर मजूगु द्वपं वय्कलं बियादिल ।
निक्वःगु खुसीइ सनिलय् न्याताः ईलय् बैठक च्वनीगु धाःगु खःसां नेतात बैठक स्थलय् उपस्थित मजुइवं खुताः इलय् जक शुरु जूगु खः । बैठकय् निगूलिं पक्षं थःथःगु हे पुलांगु अडान कायम याःगु खः । थौंया बैठक निष्कर्षविहीन जुइवं स्वंगू दलत दथुइ हानं मेगू बैठक बिहीवा: झिंछता: इलय् च्वनीगु जूगु दु ।
थ्वहे दथुइ संविधानसभाया म्याद थप यायेत स्वंगू दलत दथुइ संविधानसभा भवनय् वार्ता जुयाच्वंगु इलय् नागरिक समाजं पश्चिम गेटय् धर्ना ब्यूगु खः । नागरिक समाजं दलतय्त सहमति यानाः अग्रगामी संविधानया सुनिश्चिताया निंतिं संविधानसभाया म्याद थप यायेत माग याःगु खः । उगु धर्नाय् नेपाल आदिवासी जनजाति महासंघं नं ऐक्यबद्धता क्यसें धर्नाय् ब्वति काःगु खः ।
