सहमतिया निंतिं सरकार गम्भीर मजुल : भट्टराई

नेपा: स्थित राष्ट्रसंघीय मिसन अनमिन प्रमुख करिन ल्यानग्रेन व एनेकपा (माओवादी)या उपाध्यक्ष डा. बाबुराम भट्टराई दथुइ बुधवाः खँल्हाबंला जूगु दु । शान्तिनगरय् च्वंगु भट्टराईया छेँय् जूगु खँल्हाबंलाय् ल्यनग्रेनं संविधानसभाया म्याद थपया बारे च्यूताः प्वंकादीगु खः ।

उगु इलय् माओवादी उपाध्यक्ष भट्टराईं म्याद थपया बारे माओवादी सकारात्मक जूगु व उकीया निंतिं लचकता क्यंसां सरकार गम्भीर मजूगु धयादिल । वय्कलं सहमतिया निंतिं प्रधानमन्त्रीया राजीनामा आवश्यक जूगु धयादिल ।

बाघौ तक जूगु खँल्हाबंलाय् ल्यनग्रेनं शान्ति प्रकृया बचे यायेत दलत दथुइ सहमति जुइमाःगु धयादिसें याकनं हे सहमति जुइगु विश्वास प्वंकादिल ।