भारतीय एसएसबीया गोलीं कयाः नेपाःमि सित

येँ (सन्ध्या टाइम्स)/भारतया अर्द्ध सैनिक बल एसएसबीया जवानतय्गु गोलीं कयाः मोरङया अमाही बरियातीइ ५५ दँ दुम्ह नेपाःमि बासुदेव साह सीगु दु। म्हिगः बहनी चिकं ज्वनाः कुवडियां वयाच्वंगु इलय् भारतीय सुरक्षाकर्मीं कयेकूगु गोलीं कयाः साह सीगु खः। घटनाया विरोधय् स्थानीय मनूतय्सं म्हिगः बहनी हे प्रदर्शन याःगु खःसा थौ नं सुथंनिसें प्रदर्शन यानाच्वंगु दु। स्थानीय मनूतय्सं गोलीं कयेकूपिंत कारवाही यायेमाःगु नापं सीम्हेसिया छेँजःयात क्षतिपूर्ति बीमाःगु माग याःगु दु। प्रदर्शनं यानाः भारतं थौं सुथंनिसें नेपाः-भारत सीमाय् सुरक्षा ब्यवस्था कडा याःगु दु ।

बी.आर. ३८ बी ००३६ नम्बरया हिरो होण्डा स्प्लेण्डर मोटरसाइकल गयाः दशगजां दुहां वःपिं निम्ह मनुखं गोलीं कयेकाः बिसिउँ वंगु खँ धाःगु दु। तर स्थानीय मनूतय्सं धाःसा भारतीय सुरक्षाकर्मीतय्सं साहया छेँय् हे वयाः गोलीं कयेका थकूगु खँ धाःगु दु। घटनास्थल विराटनगरं ३० किलोमिटर पूर्वी दक्षिणपाखे लाः ।