थौं बुंगद्यःयात नैंक्यालं लुइगु
यल (सन्ध्या टाइम्स)/बुंगद्यः जात्राया झ्वलय् थौं थनया टंगलय् नैंक्यालं लुइगु जात्रा जुइत्यंगु दु। थौं बुंगद्यः व चाकुबाःद्यःया रथया च्वं नैंक्याः कुर्काः थ्व जात्रा याइ। रथया च्वं कुर्कीगु उगु नैंक्याः लाये फुसा भाग्य लाइ धइगु विश्वास दुगुलिं उगु नैंक्याः लायेत अन तःधंगु हे भिड जुइ ।
थौं नैंक्यालं लुइधुंकाः कन्हय् सुथ न्हापां मिसापिं जक जानाः बुंगद्यःया रथ साली। थुकी यल बाहेक मेमेथाय् च्वंपिं मिस्त नापं वयाः छहाकःचा बुंगद्यःया रथ सालीगु खः ।
