स्वंगू दलया बैठक न्ह्यः सुद प्रम निवासय्

बुधवाः सुथय् च्यताः इलय् प्रधानमन्त्री सहित स्वंगू दलया बैठकय् च्वने न्हय् भारतीय राजदूत राकेश सुद प्रधानमन्त्री निवास बालुवाटार थ्यंकादीगु दु । बालुवाटार थ्यंकाः सुदं प्रधानमन्त्री नेपाल नाप संविधानसभाया म्याद थपया बारे सहलह यानादीगु खः ।

खँल्हाबंलाय् विद्यमान राजनीतिक गतिरोध अन्त्यया निंतिं जुयाच्वंगु कुतः, संविधानसभाया म्याद थप नापं प्रधानमन्त्री माधवकुमार नेपालया राजीनामाया बारे खँल्हाबंला जूगु खँ धाःगु दु । नापं प्रधानमन्त्री माधवकुमार नेपालं स्वंगू दल दथुइ जुयाच्वंगु वार्ताया बारे सुदयात जानकारी बियादीगु खँ धाःगु दु ।

खँल्हाबंलाया बारे प्रधानमन्त्री नेपाल व राजदूत सुदं छुं प्रतिक्रिया बियामदी । स्वंगू दलया बैठक न्ह्यः जूगु थुगु गोप्य वार्तायात राजनीतिक विशलेषकतय्सं अर्थपूर्ण रुपय् काःगु दु ।