राजसंस्था अन्त्य मजुनीगु अभिव्यक्ति सर्वसाधारणया बिचाः : ज्ञानेन्द्र
पुलांम्ह जुजु ज्ञानेन्द्र शाहं छुं ई न्ह्यः जनकपुरय् राजसंस्था अन्त्य मजुनी धकाः थःम्ह बियाःगु अभिव्यक्तियात सर्वसाधारणया बिचाः जूगु खँ धयादीगु दु । वय्कलं उगु इलय् सर्वसाधारणं प्वंकूगु बिचाःयात थःम्ह न्ववानाःगु जक धयादीगु दु ।
मंगलवाः बहनी ईमज च्यानलयात अर्न्तवार्ता बियादिसें ज्ञानेन्द्रं राजसंस्थां गवलें नं 'पपुलारिटी' मखसें 'युनिटी' चाहे जूगु धयादिल । राजसंस्था अन्त्य मजूनी धकाः थःम्ह ब्यूगु अभिव्यक्ति प्रति नेतातय्सं थीथी बिचाः प्वंकूगु खँय् वय्कलं नेतात जूगुलिं न्ववायेगु अधिकार दइगु तर न्यनेगु नं इमिगु कर्तव्य जूगुलिं इमिसं मेपिनि खँ नं न्यनेफयेमाःगु धयादिल ।
राजसंस्था छिगु हे पालय् अन्त्य जूगु प्रति थःत दोषी तयेकादियाला धकाः न्यंगु छगू न्ह्यसःलय् वय्कलं दोषी मखसें दुःखी महसूस जूगु व धोका ब्यूगु महसूस जुयाच्वंगु धयादिल । तर वय्कलं राजतन्त्र अन्त्यया वास्तविक असर मनूतय्सं अनुभव व थुइके ल्यं दनीगु धयादिल ।
थौं कन्हय् थः छम्ह सामान्य नागरिकया जीवन हनाच्वनाःगु धयादिसें वय्कलं सुथय् खुताः इलय् दनाः पाठ यायेगु व न्हि निक्व मनूत नापलायेगु यानाच्वनाःगु धयादिल । वय्कलं थःगु छेँय् नं सामान्य नेपालीतय् छेँय् थें लोडसेडिङ जुइगु व ल: मवःगु धयादिल ।
वैशाष ११ गते तथाकथित सम्झौताया बारे थःम्ह न्ववायेगु पाय्छि मजुइगु धयादिसें थुकीया बारे नेपालीतय्सं थुइके धुंकूगु व थुकीया बारे यक्व खँ पात्रपत्रिकाय् वयेधुंकूगु धयादिल । अथेहे वय्कलं वीरेन्द्रया वंशनाशय् भारत व अमेरिकाया ल्हाः दुगु छुं प्रमाण मलूगु व छानबीन आयोगं नं उगु खँया बारे छुं न्ह्यमथंगुलिं थुकीया बारे विश्वास यायेमफइगु धयादिल ।
हिन्दु राज्यया सम्भावनाया बारे न्यंगु न्यसःलय् वय्कलं थुकीया बारे थःम्ह धायेगु खँ मखुगु धयादिसें च्यय्गू प्रतिशत जनता भगवनय् विश्वास याइगु जूगुलिं नेपाःयात हिन्दु राज्य मधाःगु प्रति इमिगु नुगः गुली स्यात जुइधइगु खँ नेतातय्सं बिचाः यायेमाःगु धयादिल ।
नेपाली जनतायात धैर्य व विवेकया साथ च्वनेत इनाप यानादिसें ज्ञानेन्द्रं थःम्हं आः हे छुं हे यायेगु बिचाः मयानाःगु तर अज्याःगु ई वयाच्वंगु जुइफुगु धयादिल ।
