संविधानसभा न्ह्यने जनजातितय् धर्ना
नेपाल आदिवासी जनजाति महासंघं संविधानसभा भंग यायेदइमु धासें मंगलवाः संविधानसभा भवन न्ह्यने धार्ना ब्यूगु दु । मंगलवाः सुथय् महासंघया आकस्मिक बैठकं संविधानसभा विघटन जुइफुगु संकेत खनेदुगु धासें संविधानसभा भवन न्ह्यने अनिश्चितकालीन धर्ना च्वनेगु ज्याझ्वः क्वःछिउगु खः ।
महासंघं संविधानसभा विघटन यानाः देय्यात गम्भीर संकटय् लाकेत्यंगुलिं शान्ति व संविधानसभा पाखें न्हूगु संविधान जारीया माग यासें धर्ना न्ह्याकूगु खः । मंगलवाः निसें संविधानसभाया पश्चिम गेट न्ह्यने शुरु जूगु धर्ना अनिश्चितकाल तकया निंतिं न्ह्याइगु खँ महासंघं धाःगु दु । धर्नाय् जनजाति सभासद्त नं धर्नास्थल थ्यंकाः ऐक्यबद्धता प्वंकूगु खः ।
महासंघं अल्पकालया निंतिं संविधानसभाया ई थप यानाः आदिवासी जनजाति, सिमान्तकृत, मधेशी, दलित, मस्लिम, अल्पसंख्यक जाति, पिछडा वर्ग, मिसा नापं विपन्न वर्गया चाहना मुताबिकया न्हूगु संविधान निर्माण यायेमाःगु माग याःगु दु ।
