स्वंगू दलया बैठक निष्कर्षविहीन
प्रमुख स्वंगू दलया शीर्ष नेतातय् बैठक निष्कर्षबिहीन जूगु दु । स्वंगूलिं दल माओवादी, कांग्रेस व एमालें थःथःगु अडान मत्वःतेवं बैठक निष्कर्षविहीन जूगु खः ।
माओवादीया मू ज्याकू कोटेश्वर पेरिस डाँडाय् मंगलवाः न्हिनय् च्वंगु बैठकय् माओवादीं प्रधानमन्त्रीं न्हापा राजीनामा बीमाःगु व कांग्रेस-एमालें न्हापा संविधानसभाया म्याद थप यायेमाःगु व मेमेगू खँय् लिपा सहलह यायेगु अडान काःगु खः । थौं सहमति मजुइवं प्याकेजय् सहमति यायेत स्वंगू दलया बैठक प्रधानमन्त्री सहित बुधवाः हानं च्वनीगु जूगु दु ।
बैठक लिपा कांग्रेस प्रवक्ता अर्जुननरिसंह केसीं दलत थःथःगु अडानय् कायम जूगुलिं सहमति जुइमफुगु धयादिसें सुनां नं मबुइगु कथं सहमति मालेगु खँय् दलत दथुइ सहमति जूगु धयादिल । वय्कलं कन्हय् बहनी वा कंस सुथय् तकया दुने सहमति जुइफइगु धयादिल ।
बैठकय् माओवादी पाखें अध्यक्ष पुष्पकमल दाहाल 'प्रचण्ड', उपाध्यक्षत डा. बाबुराम भट्टराई व नारायणकाजी श्रेष्ठ 'प्रकाश'या ब्वति दुगु ख:सा कांग्रेस पाखें कार्यवाहक सभापति सुशील कोइराला, वरिष्ठ नेता शेरबहादुर देउवा, महामन्त्री विमलेन्द्र निधी, नेतात कृष्णप्रसाद सिटौला व अर्जुननरसिंह केसी अथेहे एमाले पाखें अध्यक्ष झलनाथ खनाल, महासचिव इश्वर पोखरेल, सचिव विष्णु पौडेल, नेतात प्रदीप ज्ञवाली व भरतमोहन अधिकारीया उपस्थिति दुगु ख: ।
