धर्मादित्य सिरपाः रुक्मणीयात
येँ (सन्ध्या टाइम्स)/नेपालभाषाया न्हापांम्ह पत्रकार धर्मादित्य धर्माचार्यया १०९ दँ बुन्हिया लसताय् थ्वहे वइगु बछलाथ्व १४ कुन्हु मांभाय् पुचः, यलपाखें थीथी ज्याझ्वः याइगु जूगु दु। वकुन्हु सुथसिया ६:३० निसें ८:३० तक पूच्वय् च्वंगु धर्मादित्यया झ्वाताय् स्वां देछायेगु ज्या जुइ ।
थ्वहे झ्वलय् दँय्दसं बिया वयाच्वंगु धर्मादित्य धर्माचार्य सिरपाः थुगुसी मय्जु रुक्मणी श्रेष्ठयात बीगु जूगु दु। 'लाय्कू' बाःछिपती वय्कलं नेवाः नसा ज्वलंया बारे नियमित रुपं च्वयादीगु च्वसुया लागिं मांभाय् पुचःपाखें थ्व सिरपाः बीत्यंगु खः। न्याद्वः व छतका दां नापं सिजःपौया थुगु वकुन्हु हे छगू ज्याझ्वःया दथुइ लःल्हाइगु ग्वसाः दु। अथेहे नेपालभाषा व पत्रकारिताया ख्यलय् बियादीगु योगदानया कदर यासें इल्वहं प्रकाशनया प्रमुख नरेशवीर शाक्ययात नं हनीगु ग्वसाः दु ।
