सर्त तयाः राजीनामा बी मखु: प्रम
येँ (सन्ध्या टाइम्स)/प्रधानमन्त्री माधव नेपालं थौं सुथय् संचारकर्मीतलिसे खँल्हासें थम्हं सुयागुं दबाबया भरय् राजीनामा बीगु जुइ मखु धयादीगु दु ।
एकीकृत नेकपा (माओवादीं) संविधानसभाया म्याद थप यायेगु खःसा प्रधानमन्त्रीं राजीनामा बियाः राष्ट्रिय सहमतिया संयुक्त सरकार दयेकेगु सुनिश्चित यायेमाः धकाः सर्त न्ह्यःने तयाः अडान कयाच्वंगु इलय् प्रधानमन्त्री माधवकुमार नेपालं धाःसा सर्तयात अस्वीकार यानादीगु खः ।
आःया अवस्थाय् सर्त तयाः सुनां नं राजीनामा माग यात धाःसा उकियात स्वीकार याये फइ मखु धासें प्रधानमन्त्री नेपालं राजनीतिक सहमति जुल धाःसा थम्हं पद त्वःता बी धकाः नं धयादिल ।
थौं सुथय् राष्ट्रपति निवास वनाः वय्कलं वर्तमान राजनीतिक अवस्था, राजनीतिक दलतय्सं यानाच्वंगु सहमतिया कुतः, थःगु भूमिका नाप नापं थःगु नेतृत्वय् दुगु वर्तमान सरकारं यानाच्वनागु ज्याया विषयसं राष्ट्रपति डा. रामवरण यादवयात जानकारी बियादीधुंकाः अन उपस्थित जूपिं संचारकर्मीतलिसे खँल्हासें वय्कलं अथे धयादीगु खः ।
राष्ट्रपतिं देशय् संकट मवयेकेगु नितिं दलतय्गु दथुइ सहमति ब्वलंकेत माःगु कथं भूमिका म्हितेत थःत इनाप यानादीगु खः धकाः नं प्रधानमन्त्री नेपालं जानकारी बियादिल ।
राष्ट्रपति यादवं आःया अवस्थाय् प्याकेजय् हे सहमति यायेत तकं प्रधानमन्त्री नेपालयात सुझाव बियादीगु खः धकाः नं वय्कलं जानकारी बियादीगु दु।
