थनिंनिसें संविधानसभाय् धर्ना
येँ (सन्ध्या टाइम्स)/संविधानसभाया म्याद थप यायेगु खँय् दलतय्गु दथुइ अन्तिम सहलह जुयाच्वंगु इलय् नेपाल आदिवासी जनजाति महासंघं संविधानसभा भंग याये दइ मखु धइगु माग यासें थनिंनिसें संविधानसभा पिने धर्ना बीगु जूगु दु। थौं सुथय् आकस्मिक रुपं च्वंगु महासघ सचिवालयया बैठकं थ्व निर्णय याःगु खः ।
महासंघया महासचिव आङकाजी शेर्पां 'सन्ध्या टाइम्स'लिसे खँल्हासें संविधानसभा भंग यायेगु षडयन्त्र जुयाच्वंगुलिं अथे मयाकेत थ्व धर्ना च्वनेत्यनागु खँ कनादिल। वय्कःया कथं थौं न्हिनय् २ बजेनिसें हे थ्व धर्ना शुरु जुइ ।
संविधानसभाया माध्यमं आदिवासी जनजाति, भाषा भाषी, लिउने लानाच्वंगु समुदाययात हक अधिकार प्राप्त जुइगु जुयाः गुगुं हालतय् नं संविधानसभा भंग याये दइ मखु धकाः धर्ना च्वनेत्यनागु खँ वय्कलं कनादिल। जनतां थःगु मत बियाः पलिस्था याःगु संविधानसभां संविधान दयेकेमाःगु खँ न्ह्यथँसें गबलय् तक संविधानसभा विघटन जुइमखु धकाः दलतय्सं ग्यारेन्टी बी मखु अबलय् तक धर्ना जारी जुइगु खँ नं वय्कलं कनादिल ।
