थीथी बौद्ध ज्याझ्वः
यल (सन्ध्या टाइम्स)/युवक बौद्ध मण्डल, नेपालया ग्वसालय् त्रिपिटिकाचार्य भिक्षु कुमार काश्यप महास्थविर च्वनाबिज्याःगु आनन्द कुटी विहारय् भोजनदान ज्याझ्वः जुल। संस्थाया पुलांम्ह नायः राजेश शाक्यया संयोजकत्वय् जूगु उगु ज्याझ्वलय् भिक्षु कुमार काश्यप महास्थविरपाखें पंचशील प्रदान व बुद्ध पूजा यानाबिज्याःगु खः। अथे हे वंगु शनिबार छन्हुया विपश्यना ध्यान शिविर नं जुल। भाइराजा शाक्यया संयोजकत्वय् जूगु उगु शिविरय् ३० म्हेस्यां ब्वति काःगु खः। वकुन्हु हे संस्थाया स्थापनाकालंनिसें आः तकयापिं कार्यसमितिया दुजःत च्वनाः २५५४ औं बुद्ध जयन्तिया लसताय् लाकाः छगू तुच्चा ज्याझ्वः नं जुल ।
ज्याझ्वलय् संस्थाया थीथी दुजःपिंसं नुगःखँ प्वंकादीगु खः।
लिसें युवक बौद्ध मण्डल, क्लब २५ या ग्वसालय् अमेरिकां झाःम्ह प्रो. डा. इभेट भर्गासं बुद्ध धर्मबारे अन्तर्क्रिया ज्याझ्वः नं जुल। संस्थाका प्रथम उपाध्यक्ष सुरेन्द्र शाक्यया सभापतित्वय् उगु ज्याझ्वः जूगु खः ।
२५५४ क्वःगु बुद्ध जयन्तिया लसताय् लाकाः वैशवर्ण महाविहार, गुजिबहाः व अन्तर्राष्ट्रिय ध्यान भावना केन्द्रया मंकाः ग्वसालय् झिंनिन्हुया अल्पकालिन श्रामणेर प्रवज्या ज्याझ्वः नं शुरु जुल। पंचशील प्रार्थना, बुद्ध पूजा यानाः न्ह्याःगु उगु ज्याझ्वलय् धर्म देशना नं जूगु खः। उगु प्रब्रज्या ज्याझ्वलय् संस्थाया अध्यक्ष हेरारत्न शाक्य, पुलांम्ह अध्यक्ष राजेश शाक्य नं प्रव्रजित जुयादीगु दु ।
