बेपत्ता डा. श्रेष्ठ याकनं मालेत माग
येँ (सन्ध्या टाइम्स)/वीपी कोइराला मेमोरियल अस्पताल भरतपुरया कार्यकारी निर्देशक डा. भक्तमान श्रेष्ठ बेपत्ता जूगुलिं वय्कःया स्थिति याकनं पत्ता लगे यानाः सार्वजनिक यायेत नेवाः जागरण मञ्चं सरकारयात माग याःगु दु ।
राज्यया छम्ह प्रतिष्ठित व वीपी कोइराला मेमोरियल अस्पताल थुज्वःगु जिम्मेवार संस्थाय् आवद्ध डा. श्रेष्ठ बेपत्ता जूगु प्यन्हु मछि दयेधुंकाः तकं राज्यं थुकियात गम्भीर रुपं मकाःगुलिं मञ्चं खेद नं प्वंकूगु दु। नापं डा. श्रेष्ठयात गुलि फु उलि याकनं मालाः नागरिकया रक्षा यायेगु ज्याय् थःगु कर्तव्य क्यनेत नं मञ्चं राज्ययात इनाप याःगु दु ।
थ्वहे झ्वलय् डा. श्रृष्ठयात मालेत सरकारं तीव्र पलाः न्ह्याकेधुन धाःसां आः तक ठोस खँ धाःसा लुइके मफुनि। डा. श्रेष्ठयात भरतपुरय् ठेकेदारी ज्या याइपिं मनूतय्सं अपहरण याकूगु जुइमाः धकाः अनुमान जुयाच्वंगु दु। वय्कलं अस्पतालया थीथी निर्माणय् जुइगु अनियमित ठेकेदारी प्रथायात नियमित यायेगु ज्या यानादीगुलिं खः ।
