म्याद थपया पक्षय् मतदान यायेत सरकारया इनाप
संविधानसभाया म्याद थप यायेगु निंतिं सरकारं व्यवस्थापिका संसदय् दर्ता याःगु संविधान संशोधन विधेयकया पक्षय् मतदान यायेत दक्वं दल व सभासद्तय्त सरकारं इनाप याःगु दु ।
मन्त्रिपरिषदया मंगलवाः च्वंगु बैठकं संविधानसभाया म्याद थप यायेगु विधेयकया पक्ष मतदान यायेत इनाप याःगु खः । थौं स्वताः इलय् च्वनीगु व्यवस्थापिका संसदया बैठकय् सरकारं विधेयक न्ह्यब्वइगु ज्याझ्वः दु ।
अथेहे मन्त्रिपरिषदया बैठकं मधेश आन्दोलनया झ्वलय् सीपिं व न्हापाया प्रमाणिकरणय् छुटे जूपिं झिंनिम्हेसित सहिद घोषणा याःगु दु । शान्तिमन्त्री रकम चेम्जोङया संयोजकत्वय् गठित समितिया अध्ययन लिपा झिंनिम्हेसित सहिद घोषणा यायेत सिफारिस याःगु खः ।
अथेहे सहिदया परिभाषा क्वःछित मोदनाथ प्रश्रितया संयोजकत्वय् गठित समितिं लःल्हाःगु प्रतिवेदनयात राजनीतिक समितिलय् छ्वयेगु निर्णय मन्त्रिपरिषदया बैठकं याःगु जानकारी अर्थमन्त्री सुरेन्द्र पाण्डें बियादिल ।
