'म्याद थप मयासाः सरकार व संविधानसभा स्वतः विघटन'
संविधानसभाया अध्यक्ष सुवासचन्द्र नेम्वाङं जेठ १४ गते तक संविधानसभाया म्याद थपे मजुसाः संसद, संविधानसभा व सरकार स्वतः विघटन जुइगु खँ धायदीगु दु ।
वय्कलं धयादिल, 'जेठ १४ गते न्हिनसिया झिंनिताः इलय् तक संविधानसभाया म्याद थप मयासाः देय् खिंउगु सुरुङ दुने दुहांवनीगु व अज्याःगु सुरुङय् दुहांवनीगु लुखा जक दइ पिहांवइगु निकास लुइमखु ।'
मंगलवाः सभासदत नाप नेपाल आदिवासी महासंघ जलवायु परिवर्तन सम्बन्धी या:गु अन्तक्रिया ज्याझ्वलय् वय्कलं म्याद थप मजुसाः संसद व संविधानसभा स्वतः विघटन जुइगु नापं सभासद्त व प्रधानमन्त्री पदमुक्त जुइगु धयादिल । अज्याःगु इलय् देशय् काम चलाउ सरकारं देय् संचालन यायेमलीगु अवस्था वइगु खँ अध्यक्ष नेम्वाङं धयादिल ।
वय्कलं अज्याःगु काम चलाउ सरकारं जनजनिर्वाचित सरकार व संस्थाया पुर्नवहाली यायेमफइगु धयादिसें जेठ १४ लिपा सहमतिया आधारय् निष्कृय संविधानसभायात हानं क्रियाशिल यायेमफइगु धयादिल । अन्तरिम संविधानया मार्फत संविधानसभा पाखें न्हूगु संविधान जारी यायेगुया विकल्प मदुगु धयादिसें नेम्वाङं दलत दथुइ सहमति जुयाः जेठ १४ दुने संविधानसभाया म्याद थप जुइगु विश्वास प्वंकादिल ।
