ल्यानग्रेनं प्रचण्ड नापलात / पौडेलया थाय् अमेरिकी राजदूत
नेपाः स्थित राष्ट्र संघीय मिसन अनमिन प्रमुख करिन ल्यानग्रेनं एनेकपा (माओवादी)या अध्यक्ष पुष्पकमल दाहाल 'प्रचण्ड'यात नापलाना नेपाःया समसामयिक विषयलय् खँल्हाबंला यानादीगु दु ।
मंगलवाः सुथय् प्रचण्ड निवास न्हू बजारय् जूगु खँल्हबंलाय् नेपाःया शान्ति प्रकृय, संविधानसभाया म्याद थप लगायात विषयलय् सहलह जूगु खः । अथेहे उगु इलय् ल्यानग्रेनं माओवादी केन्द्रीय कमिटीं याःगु निर्णयया बारे च्यूताः प्वंकादीगु खः । उगु इलय् प्रचण्डं राजनीतिक दलत दथुइ सहमति कायम यानाः न्ह्याः वनेत थःगु दल प्रतिबद्ध जूगु धयादीगु ख: ।
उखे अमेरिकी राजदूत स्कट एच. डेलीसीं कांग्रेस संसदीय दलया नेता रामचन्द्र पौडेल नाप खँल्हाबंला यानादीगु दु । कांग्रेस संसदीय दलया ज्याकूथीइ जूगु खँल्हाबंलाय् डेलीसीं शान्ति व लोकतान्त्रिक प्रकृयायात न्ह्याकेत राजनीतिक दलत दथुइ सहमति जुइमाःगु अमेरिकी चाहना जूगु धयादिल । नापं वय्कलं उकीया निंतिं आवश्यक ग्वाहालि यायेत अमेरिका प्रतिबद्ध दुगु धयादिल ।
अथेहे डेलीसीं नेपाःया लिप्पांगु राजनीतिक घटनाक्रम, शान्ति व संविधान निर्माणया बारे च्यूताः प्वंकादीगु खः । उगु इलय् पौडेलं राजनीतिक दलत प्यकेजय् हे समस्याया समाधान यायेत लगे जुयाच्वंगु धयादिल । वय्कलं अज्याःगु प्याकेजय् संविधानसभाया म्याद थप नापं माओवादी लडाकुया व्यवस्थापना व समायोजन, वाइसीएलया अर्ध सैन्य संरचना भंग लगायत विषयत दुथ्याइगु धयादिल ।
