राष्ट्रपति व प्रधानमन्त्री दथुइ खँल्हाबंला
प्रधानमन्त्री माधवकुमार नेपालं राजनीतिक गतिरोध निकासया निंतिं जुयाच्वंगु सहमतिया कुतः व संविधानसभाया म्याद थपया निंतिं जुयाच्वंगु कुतःया बारे राष्ट्रपति डा. रामवरण यादवयात जानकारी बियादीगु दु ।
मंगलवाः सुथय् राष्ट्रपति भवन शितल निवास थ्यंकाः प्रधानमन्त्री नेपालं संविधानसभाया म्याद थपया निंतिं संसदय् यंकूगु विधेयक नापं सहमतिया पाखें हे संविधानसभाया म्याद थप यायेत जुयाच्वंगु कुतःया बारे जानकारी बियादीगु खः ।
उगु इलय् राष्ट्रपति यादवं संविधानसभा पाखें हे संविधान जारी जुइमाःगु जनताया चाहना जूगुलिं दलत दथुइ सहमति यानाः म्याद थप यायेमाःगु धयादिल । वय्कलं प्रधानमन्त्रीयात सहमतिया माध्यमं हे न्ह्याः वनेत सुझाव बियादिसें दलत दथुइ सहमति जुइगु विश्वास प्वंकादिल ।
अथेहे सोमवाः बहनी संविधानसभाया अध्यक्ष सुवासचन्द्र नेम्वाङ नं शितल निवास थ्यंकाः संविधानसभाया म्याद थप सम्वन्धी प्रकृयाया बारे राष्ट्रपति यादवनाप खँल्हाबंला यानादीगु खः । वय्कलं संविधानसभाया म्याद थप सम्बन्धी विधेयक व दलत दथुइ सहमतिया निंतिं जुयाच्वंगु कुतःया बारे राष्ट्रपतियात जानकारी बियादीगु खः ।
