भक्तमान सकुशल दु : छानबिन पुचः
न्हय्न्हु न्हय: निसें बेपत्ता जुयादीम्ह बीपी कोइराला मेमोरियल अस्पतालया कार्यकारी निर्देशक डा. भक्तमान श्रेष्ठ सकुशल दुगु खँ नागरिक छानबिन पुचलं धाःगु दु ।
नेपाल चिकित्सक संघ व पेशाकर्मीत दुथ्याःगु नागरिक छानबिन पुचलं सोमवाः श्रेष्ठया छेँजः, क्यान्सर अस्पतालया चिकित्सक, प्रहरी, प्रजिअ, अधिकारकर्मी नापं ब्रिफकेश लूगु थाय् दारेचोकया स्थानीय बासिन्दनापया खँल्हबंलाया अधारय् श्रेष्ठया अवस्था सकुशल जूगु खँ धाःगु खः ।
प्रारम्भिक छानबिन लिपा सोमवाः सनिलय् भक्तमान बचाउ अभियानं चितवन क्यान्सर अस्पतालय् याःगु छगू अन्तक्रिया ज्याझ्वलय् नेपाल मानव अधिकार संगठया अध्यक्ष सुदीप पाठकं आः तकया अनुसन्धानं श्रेष्ठया अवस्था सकुशल दुगु व छन्हु-निन्हु दुने हे वय्क लिहांवइगु दावी यानादिल ।
अथेहे नेपाल बार एसोसियसनया अध्यक्ष प्रेमबहादुर खड्कां घटना सुनियोजित रुपं जूगु जूसां श्रेष्ठ सकुशल दुगु जानकारी प्राप्त जूगु कनादिल । वय्कलं श्रेष्ठया रिहाइया निंतिं अनावस्यक अन्तर्क्रिया व दबाब मबीत इनाप यानादिल ।
नेपाल चिकित्सक संघया अध्यक्ष डा. केदारनरसिंह केसीं श्रेष्ठयात उच्च तहया षड्यन्त्रया आधारय् हे बेपत्ता देयेकूगु धयादिसें वय्कया रिहाइया निंतिं यक्व तच्वःगु ज्याझ्वः याःसा अपहरणकारीतय्सं मखुगु पलाः ल्ह्वनेफइगुलिं केन्द्रया ज्याझ्वः कथं न्ह्याः वनेत स्थानीय चिकित्सकतय्त सुझाव बियादिल ।
