सर्सत म्याद थप यायेफइगु माओवादी निर्णय
एकीकृत नेकपा (माओवादीं) सर्सत संविधानसभाया म्याद थप यायेफइगु निर्णय याःगु दु । सोमवाः क्वचाःगु पार्टी केन्द्रीय कमिटीं प्रधानमन्त्रीया राजीनामा व राजनीतिक दलत दथुइ राष्ट्रिय सहमति जुसाः जक संविधानसभाया म्याद थप यायेगु निर्णय याःगु दु ।
वंगु शुक्रवाः निसें न्ह्याःगु केन्द्रीय कमिटीया बैठकया निर्णय सार्वजनिक यायेत सोमवाः पार्टी मू ज्याकू पेरिस डाँडाय् ग्वसाःग्वःगु पत्रकार सम्मेलनय् पार्टी अध्यक्ष पुष्पकमल दाहाल 'प्रचण्डं' संविधानसभायात विघटन यायेदइमखु धयादिसें थुकीयात म्वाःका हे तयेमाःगु धयादिल । तर वय्कलं सहमति मजुसाः गवलें नं संविधान निर्माण यायेमफइगुलिं आःया अवस्थाय् सहमति बिनाः म्याद थप यायेगु औचित्यहीन जुइगु धयादिल ।
संविधानसभायात हे संविधान च्वयेगु थाय् कथं छ्यलेमाःगु व उकीया निंतिं सहमति आवश्यक जूगु प्रष्ट यानादिसें प्रचण्डं संविधान च्वयेत खुला पर्याप्त जूगुलिं आः दच्छिया निंतिं मखसें खुलाया निंतिं जक म्याद थप यायेमाःगु धयादिल ।
संविधानसभाया निंतिं प्रधानमन्त्रीया राजीनामा व बहुमतीय प्रणाली पाखें सहमतीय प्रणालीलय् वनेमाःगु अडान कयाच्वंगु माओवादीं थःपिंसं धाःगु राष्ट्रिय सहमतिया दुने राष्ट्रिय सरकार नं लाइगु खँ धाःगु दु । तर अज्या:गु सरकारया नेतृत्व बारे सहलस यायेफइगु खँ धा:गु दु ।
केन्द्रीय कमिटीया बैठकय् वरिष्ठ उपाध्यक्ष मोहन वैद्य 'किरण' संविधानसभाया म्याद थप यायेमज्यूगु धका: च्वयात:गु राजनीतिक प्रतिवेदन व उपाध्यक्ष डा. बाबुराम भट्टराईं पेश यानादीगु निर्सत संविधानसभाया म्याद थप यायेमाःगु प्रतिवेदनया पलेसाः प्रचण्डया सर्सत संविधनसभाया म्याद थप यायेफइगु प्रतिवेदन छगू मतं पारित याःगु खः । केन्द्रीय कमिटीं याःगु निर्णय परिस्थिति स्वयाः मेगू निर्णय कायेफइगु जिम्मा अध्यक्ष प्रचण्ड व स्थायी समितियात ब्यूगु दु ।
अथेहे बैठकं भारतया मेघालयय् नेपाली मूलया भारतीयतय्त जुयाच्वंगु आक्रमण प्रति सरकारं छुं प्रतिक्रिया मब्यूगु प्रति आपत्ति प्वंकूगु दुसाः न्ह्य्न्हु न्ह्यः अपहरणय् लानादीम्ह बीपी कोइराला मेमोरियल अस्पतालया कार्यकारी निर्देशक डा. भक्तमान श्रेष्ठया जीवन रक्षा व अपहरणकारीतय्त कडा कारवाही यायेत माग याःगु दु ।
