अल्पकालया निंतिं म्याद थप यायेत जनजाति महासंघया इनाप
नेपाल आदिवासी जनजाति महासंघं संविधानसभा विघटन याना: देय्यात राजनीतिक शुन्यता पाखे यंकेमज्यूगु धासें अल्पकालया निंतिं संविधानसभाया म्याद थप यायेत इनाप याःगु दु ।
महासंघया अध्यक्ष राजकुमार लेखीं सोमवाः छगू विज्ञप्ति पिथंसें क्वःछिनातःगु इलय् हे संविधान जारी मजुइगु वर्तमान परिस्थितिलय् संविधानसभाया कार्यकाल अल्पकालया निंतिं थपे यायेगु उपयुक्त जुइगु खँ धा:गु दु ।
देशय् न्हूगु संविधान जारी मजुइकं संविधानसभा विघटन जुइगु परिस्थिति वगुलिं महासघं चिन्तित जूगु धासें इलय् हे संविधान जारी जुइमफुगुलिं संविधानसभाय् दुथ्याःगु दक्वं राजनीतिक दलं नैतिक व राजनीतिक जिम्मेवारी कायेमाःगु खँ विज्ञप्तिइ न्ह्यथनातःगु दु ।
संविधान हे जारी मजुइकं संविधानसभायात विघटन यायेगु धइगु आदिवासी जनजाति, दलित, मुस्लिम, मधेसी, अल्पसंख्यक व सीमान्तकृत समुदाय व थीथी वर्गयात अधिकार मब्यूसें पुलांगु हे वर्ग व समुदायं याकति ढंगं निरन्तर राज्यसत्ता चले यायेत स्वःगु खः धासें विज्ञप्तिइ सशर्त संविधानसभाया कार्यकाल थप यानाः नेपाःया आदिवासी जनजाति, दलित, मुस्लिम, मधेसी, अल्पसंख्यक व सीमान्तकृत समुदाय नापं विपन्न वर्गया चाहना मुताबिक न्हूगु संविधान जारी यायेत माग याःगु दु ।
