स्वंगू दलया इनापय् संसदया बैठक स्थगित
सोमवाः स्वता: इलय् च्वनीगु धा:गु व्यवस्थापिका संसदया बैठक प्रमुख स्वंगू दलया इनापय् स्थगित याःगु दु । स्वंगूलिं दलत माओवादी, कांग्रेस व एमालेया सचेततय्सं सभामुख सुवासचन्द्र नेम्वाङयात बैठक स्थगित यायेत या:गु इनाप लिपा कार्यव्यवस्था परामर्श समितिया बैठक च्वनाः सोमवाःया बैठक सूचं तिका स्थगित या:गु ख: ।
सोमवाः सुथय् स्वंगू दलया शीर्ष नेतातय् बैठकय् संविधानसभाया म्याद थप यायेत सरकारं दर्ता याःगु संविधानसभाया संशोधन विधेयक व माओवादीं दर्ता याःगु विरोधया सूचंयात व्यवस्थापिका संसदया कार्यसूची पाखें चीकेगु सहमति जूगु खः । बैठकं थप सहलह यानाः सहमति कायम यायेगु निंतिं कार्यसूची पाखें निगूलिं विषय्त चीकेगु निर्णय याःगु खः ।
सोमवाः च्वनीगु व्यवस्थापिका संसदया बैठकय् सरकारं संविधानसभाया म्याद थप यायेत संविधान संशोधनया निंतिं दर्ता याःगु प्रस्ताव व माओवादीं दर्ता याःगु विरोधया सूचं सम्बन्धी सहलह व मतदानया बारे संसदय् न्ह्यब्वइगु ज्याझ्वः दुगु खः ।
