हाकुगु न्हि कुन्हु बसन्तपुली विशेष सभा
येँ (सन्ध्या टाइम्स)/नेवाः स्वायत्त राज्य मंकाः संघर्ष समितिं आः वइगु जेठ १८ गतेया हाकुगु न्हि हनेगु झ्वलय् थीथी कथंया ज्याझ्वःत याइगु जूगु दु। थौं सुथय् च्वंगु समितिया बैठकं थ्व निर्णय याःगु खः। बैठकं निर्णय याः कथं जेठ १८ गते हाकुगु न्हि हनेगु झ्वलय् बसन्तपुली छगू विशेष सभा याइगु जूगु दु। वकुन्हु सभाय् सहभागी जूवःपिं सकस्यां छपु छपु हाकुगु ध्वाँय् ज्वना वःगु दइ। लिसें अन न्ववाइपिं वक्तात नं विशेष जुइगु खँ ग्वसाः खलकं धाःगु दु ।
१८ गतेया ज्याझ्वः ताःलाकेत इनाप यासें जेठ १६ व १७ गते निन्हुयंकं येँ, यल, तोखा, ख्वप व किपुली विशेष भेलात याइगु जूगु दु। लिसें थःपिनि आन्दोलन सम्बन्धी समाचारयात थाय् मबिउगु विरोधय् जेठ १२ गते सुथय् गोरखापत्र संस्थान, जेठ १४ गते 'नागरिक' न्हिपौया ज्याकु व १५ गते 'कान्तिपुर' न्हिपौया ज्याकुथी धर्ना बीगु ज्याझ्वः दयेकूगु दु। उकथं हे १४ गते धर्म निरपेक्षता विरोधीतय् प्रतिक दयेकाः पुतला च्याकेगु ज्याझ्वः दु। असनं जुलुस वनाः रत्नपार्कया शान्ति बाटिकाय् उगु पुतला च्याकी। अथे हे जेठ १५ गते बहनी संघीयता विरोधीतय् प्रतिक पुत्ला दयेकाः च्याकेगु ज्याझ्वः दु। थ्व नं असनं जुलुस पिकयाः तिंख्यः ध्वाखाय् पुत्ला च्याकीगु ग्वसाः दु ।
जेठ १८ गते येँ मनपाय् नेवाः भाय्यात बिउगु मान्यता सर्वोच्च अदालतं खारेज याना बिउगु खः ।
