विजेश्वरीइ ग्याँस सिलिण्डर मुयाः छखा हे छेँया स्वम्ह सित
येँ (सन्ध्या टाइम्स)/थौं सुथय् येँया विजेश्वरी लागाय् छखा छेँय् जा थुइगु ग्याँस मुयाः च्याःगु मिं पुनाः छगू हे परिवारया मां, काय व म्ह्याय् यानाः स्वम्ह मनू सीगु दु ।
थौं सुथय् जा थुइत्यंगु इलय् जा थुइगु ग्याँस मुयाः जूगु उगु घटनाय् लानाः मेपिं प्यम्ह नं घाःपाः जूगु दु। जा थुइत्यंगु इलय् ग्याँस मुयाः रामेछाप जिल्लाया सैंदु गाविसया सीता नेपाली व वय्कःया प्यदँ दुम्ह काय रमित नेपाली व दच्छि दुम्ह म्ह्याय् रमिता सीगु खः ।
येँया विजेश्वरी देगः लिकसं धर्मरत्न शाहीया छेँय् उगु कथं दुर्घटना जूगु खः। उगु दुर्घटनाय् लानाः ३५ दँया रुद्र नेपाली, ३५ दँया गीता बिष्ट, २७ दँया दिलमाया लामा व १५ दँया विशाल लामा घाःपाः जूगु दु ।
अथे ग्याँस मुयाः छेँ तकं च्याःगु खःसा स्थानीय मनूत, प्रहरी व दमकलं मियात नियन्त्रणय् कायेत ताःलाःगु खः। उगु घटनाय् लानाः घाःपाः जूपिं न्याम्हेसित नं वासः यायेगु ज्या जुयाच्वंगु दु धकाः स्थानीय प्रहरीं धाःगु दु ।
