जन्तीया भ्यान दुर्घटनाय् निम्ह सित
येँ (सन्ध्या टाइम्स)/वंगु चान्हय् जन्ती वंगु भ्यान व मालबाहक ट्रक ल्वानाः निम्ह मनू सीगु दुसा मेपिं झिंच्याम्ह घाःपाः जूगु दु। वंगु चान्हय् पूर्व पश्चिम राजमार्ग अन्तर्गत बाराया डुमरावानय् उगु दुर्घटना जूगु खः। चितवनं जन्ती ज्वनाः झापाय् वनाच्वंगु ग. १ च ३७४९ नम्बरया भ्यान व विपरित दिशां वःगु ना. १ ख ४२६२ नम्बरया मालबाहक ट्रक ल्वानाः उगु दुर्घटना जूगु खः ।
दुर्घटनाय् लानाः इहिपाः याःम्ह झापाया मेघदर पौडेल तसकं घाःपाः जूगु दुसा वय्कःया अबु यमकान्त पौडेल व भ्यानया चालक विनोद सुनुवार सीगु दु। दुर्घटनाय् लानाः दिपक सुनवार व कौशला सुवेदी नं तसकं घाःपाः जूगु दुसा घाःपाः जूपिंत वीरगन्जया नारायणी उप क्षेत्रीय अस्पतालय् वासः याकाच्वंगु दु। प्रहरीं दुर्घटनाय् लाःगु ट्रकया चालकयात ज्वनेधुंकूगु दु ।
