म्याद थप सम्बन्धी विधेयक पेश मयायेगु सहमित
प्रमखु स्वंगू दल दथुइ सरकारं संविधानसभाया म्याद थप यायेत दर्ता याःगु संविधान संशोधन विधेयक व्यवस्थापिका संसदया कार्यसूची पाखें चीकेगु सहमति जूगु दु । स्वंगू दलत दथुइ सहमतिया माध्यमं हे संविधानसभाया म्याद थप यायेफइगु व विधेयक पेश याःसा ई मगाइगुलिं थुकीयात कार्यसूचीं चीकेगु सहमति याःगु खः ।
सोमवाः एनेकपा (माओवादी), नेपाली कांग्रेस व नेकपा (एमाले)या शीर्ष नेतात दथुइ येँया होटल एभरेष्टय् जूगु बैठकय् सरकार पाखें दर्ता याकूगु संशोधन विधेयक व माओवादी पाखें सरकारया संशोधन विधेयकय् दर्ता याःगु विरोध सूचं नं कार्यसूची पाखें चीकेगु सहमति जूगु खः । व्यवस्थापिका संसदया बैठकय् स्वंगू दलया सचेतकत मार्फत कार्यसूची पाखें निगूलिं विषय चीकेत सभामुख समक्ष प्रस्ताव यंकेगु सहमति याःगु खः ।
सोमवाः च्वनीगु व्यवस्थापिका संसदया बैठकय् सरकारं संविधानसभाया म्याद थप यायेत संविधान संशोधनया निंतिं दर्ता याःगु प्रस्ताव व माओवादीं दर्ता याःगु विरोध सूचं सम्बन्धी सहलह व मतदानया बारे संसदय् न्ह्यब्वयेगु ज्याझ्वः दु ।
बैठकय् माओवादी अध्यक्ष पुष्पकमल दाहाल 'प्रचण्ड', वरिष्ठ उपाध्यक्ष मोहन वैद्य 'किरण', उपाध्यक्ष डा. बाबुराम भट्टराई, कांग्रेसया कार्यवहाक सभापति सुशील कोइराला, संसदीय दलया नेता रामचन्द्र पौडेल, महामन्त्री विमलेन्द्र निधि नापं एमाले पाखें अध्यक्ष झलनाथ खनाल, महासचिव इश्वर पोखरेल, लगायत नेतातय् उपस्थिति दुगु खः । प्रधानमन्त्री माधवकुमार नेपाल धाःसा माओवादी बैठक स्थलं पिहांवनेधंकाः जक थ्यंकादीगु खः ।
