झिंन्यागू दलपाखें प्रचण्डयात ज्ञापनपत्र
संविधानसभाय् दुथ्याःगु चीचीधंगु झिन्यागू दलं संविधानसभाया म्याद थप यायेत सहमति यायेत एनेकपा (माओवादी)या अध्यक्ष पुष्पकमल दाहाल 'प्रचण्ड'यात ज्ञापनपत्र लःल्हाःगु दु । प्रचण्डयात आइतवाः हे ज्ञापनपत्र लःल्हायेगु ज्याझ्वः दुगु खःसां वय्कल केन्द्रीय कमिटीया बैठकय् व्यस्थ जुयादीगुलिं थौं जक ज्ञापनपत्र लःल्हाःगु खः ।
सोमवाः माओवादी केन्द्रीय ज्याकू पेरिस डाँडाय् थ्यंकाः झिंन्यागू दलया नेतातय्सं संविधानसभाया म्याद थप यायेगु विषययात सरकारया राजीनामा नाप मस्वायेत इनाप याःगु खः । नापं उमिसं संविधानसभाया म्याद थप लिपा जक राष्ट्रिय सहमतिया सरकारया बारे सहलह यायेमाःगु खँ धाःगु खः ।
नेकपा (माले), राष्ट्रिय प्रजातन्त्र पार्टी, राष्ट्रिय जनशक्ति पार्टी, नेकपा (संयुक्त) लगायत झिंन्यागू दलया ज्ञापनपत्रया बारे माओवादी अध्यक्ष सकारात्मक जूगु खँ माले अध्यक्ष सीपी मौनाली कनादिल । झिंन्यागू दलं आइतवाः नेपाली कांग्रेसया संसदीया दलया नेता रामचन्द्र पौडेल व नेकपा (एमाले)या अध्यक्ष झलनाथ खनालयात संविधानसभाया म्याद थप यायेगु खँय् गम्भीर जुइत ज्ञापनपत्र लःल्हायेधुंकूगु दु ।
