सर्वोच्चं संविधानसभाया म्याद थप यायेफइगु निर्णय
सर्वोच्च अदालतं संविधानसभाया म्याद थप यायेफइगु निर्णय न्यंकूगु दु । थ्व नापं संविधानसभाया कार्यकाल थप यायेगु लँपु चाःगु दु ।
संविधान संशोधन यानाः संविधानसभाया कार्यकाल अप्वयेके मज्यूगु दाबी सहित दायर याःगु रिटय् सर्वोच्चं थंज्याःगु निर्णय न्यंकूगु खः । भरत जंगमं अन्तरिम संविधानया धारा-६४य् संविधानसभाया कार्यकाल निदँ किटान यानातःगुलिं उकी संशोधन यानाः म्याद थप यायेगु अधिकार दलतय्त मदुगु जिकिर यासें जेठ २ गते दायर याःगु रिटय् सर्वोच्चया न्यायाधीशत खिमराज रेग्मी व कृष्णप्रसाद उपाध्यायया मंकाः इजलासं अन्तरिम आदेश जारी यायेम्वाःगु निर्णय न्यंकूगु खः ।
अन्तरिम संविधानया प्रस्तावनाय् नेपाली जनतायात थःगु संविधान थःम्ह हे निर्माण यायेदइगु अधिकार प्रत्याभूत यानात:गु, संविधानसभा पाखें न्हूगु संविधान जारी मजुतल्लेया निंतिं राजनीतिक सहमति पाखें तयार याःगु अन्तरिम संविधान जारी यानात:गु व उगु संविधानया धारा १४८ समेतयात बिचाः यानाः सुविधा, सन्तुलन व अपुरणीय क्षतिया दृष्टिकोणं अन्तरिम आदेश जारी यायेम्वाःगु निर्णय सर्वोच्चं या:गु ख: ।
