माओवादी केन्द्रीय कमिटीया बैठक कन्हय् क्वचाइगु
प्रमुख प्रतिपक्षी दल एनेकपा (माओवादी)या केन्द्रीय कमिटीया बैठक कन्हय् क्वचाइगु जूगु दु । शुक्रवाः निसें न्ह्याःगु बैठक थौं हे क्वचाइगु खँ धाःगु खःसां केन्द्रीय दुजःतय्सं न्ववायेगु ज्या मसिधगुलिं कन्हय् हानं बैठक च्वनीगु जूगु खः ।
पार्टी अध्यक्ष पुष्पकमल दाहाल 'प्रचण्ड'या राजनीतिक प्रतिवेदनय् कयाः शुक्रवाः निसें न्ववापिं अधिकांश केन्द्रीय दुजःतय्सं आःया अवस्थाय् संविधानसभाया म्याद थप यायेगुया औचित्य मदइगु बिचाः प्वंकूगु दु । दुजःतय्सं पार्टीं काःगु अडानय् लचकता क्यसें यदि प्रधानमन्त्रीया राजीनामा व राष्ट्रिय सहमतिया सरकार गठन यायेगु खँय् मेगू दलतय्सं प्रतिबद्धता प्वंकूसाः संविधानसभाया म्याद थप यायेगु बारे बिचाः यायेफइगु खँ धाःगु दु ।
अध्यक्ष प्रचण्डया प्रतिवेदनय् न्हापाया समिक्षा, वर्तमान अवस्था व भावी योजना दुथ्याकातःगु दु । सोमवाः दक्वं केन्द्रीय नेतातय्सं न्ववाये सिधेवं अध्यक्षं नेतातय् न्ह्यसःया लिसः बियाः राजनीतिक प्रतिवेदनयात परिमार्जन सहित पारित यासें बैठक क्वचायेकीगु ज्याझ्वः दु । माओवादी दकलय् तःधंगु दल जूगु व संविधानसभाया म्याद थप यायेगु व मययोगु बारे माओवादीया धारणा थुगु हे बैठकं निर्णय याइगु जूगुलिं थुगु बैठकयात दक्वसिनं महत्व बियाः स्वयाच्वंगु दु ।
