प्रधानमन्त्री नेपाल पाखें आत्मालोचना
प्रमया अभिव्यक्ति छुं न्हूगु खँ मखु : माओवादी
प्रधानमन्त्री माधवकुमार नेपालं संविधानसभाया पक्ष थः मदुगु धयाः बियादीगु अभिव्यक्ति प्रति आत्मालोचना यानादीगु दु । आइतवाः सत्ता साझेदार झिगू दलया बैठकय् नेतातय्सं प्रधानमन्त्रीया अभिव्यक्ति प्रति आपत्ति प्वंकेवं वय्कलं आत्मालोचना यानादीगु खः ।
अथेहे सत्ता साझेदार दलतय् बैठकय् संविधनसभाया म्याद थप यायेगु बारे सहलह जूगु दु । झिगू दलं माओवादीयात संविधानसभाया म्याद थप यायेत इनाप नं याःगु दु । अथेहे जेठ १४ लिपा संकटकाल लागु यायेगु वा मेगू छुं पला ल्ह्वनेगु धइगु बारे नं बैठकय् सहलह जूगु खः ।
उखे माओवादी प्रवक्ता दिनानाथ शर्मां प्रधानमन्त्रीया अभिव्यक्ति छुं न्हूगु खँ मखुगु धयादीगु दु । माओवादी ज्याकूथी पत्रकारत नाप खँल्हाबंला यानादिसें वय्कलं प्रधानमन्त्री नेपाल न्हापां निसें संविधानसभाया पक्षय् मदुगु तर उगु खँ आः वास्तविकता जक पिहांवगु धयादिल । वय्कलं देशी-विदेशी प्रतिक्रियावादी पुचःत सुंनं संविधानसभाया पक्षय् मदुगु धयादिल ।
