ज्ञानेन्द्रया सातो कायेत छानबिन
सरकारं उकुन्हु छक्वः आका-झाकां धइथें दरवार हत्याकाण्डया पुनः छानबिन यायेगु धकाः खँ पित हल । खँ पित हल, तर ज्या धाःसा अझं न्ह्याकूगु मदुनि । आखिर सरकारं छाय् थ्वहे इलय् दरवार हत्याकाण्डया छान-बिन यायेगु खँ पित हल - थुकिया लिउने पुलांम्ह जुजु ज्ञानेन्द्रं यानाच्वंगु भारत भ्रमणया खँ सुलाच्वंगु दु ।विज्ञ सूत्रतय्सं बिउगु जानकारी कथं सरकारं थ्व खँ पित हःगुया मुख्य कारण भारत भ्रमणय् वनाच्वंम्ह भाजु ज्ञानेन्द्र शाहयात ख्यायेत खः । प्रधानमन्त्री प्रचण्ड व अर्थ मन्त्री डा. बाबुराम भट्टर्राई लगायतया माओवादी नेतातय्सं भाजु ज्ञानेन्द्र शाह फुसा राजतन्त्र हे लित हये धइगु ताः तयाः भारत भ्रमणय् वनाच्वंगु खः । भारतय् धाथें राजतन्त्र लित हयेगु कथं छुं चलखेल यात धाःसा नेपालय् दरवार हत्या काण्डया केश हानं खुले जुइ धकाः ख्याच्वः बीत थ्व खँ पित हःगु दावी सूत्रया दु । छुं जुयाः दरवार हत्याकाण्डया पुनः छानबिन जुयाः उकी पुलांम्ह जुजु ज्ञानेन्द्र व वय्कःया सन्तान दोषी खः धइगु प्रमाणित जुल धाःसा राजतन्त्र लिहां वइगु ला खँ हे त्वःते, ज्ञानेन्दं्र आः थःत दुगु सम्मान नं तंके माली । यदि चलखेल मयासे सुम्क च्वन धाःसा छानबिन-पाखें वय्कःयात 'क्लिनचिट' वयेफुगु सम्भावना नं दु ।
