जेष्ठ १८ गते हाकुगु न्हि हनीगु

येँ (सन्ध्या टाइम्स)/नेवाः स्वायत्त राज्य मंकाः संघर्ष समितिं नेपाःया आदिवासी जनजातितय्सं हाकुगु न्हि धकाः हना वयाच्वंगु दिं वइगु जेष्ठ १८ गते विशेष ज्याझ्वः यानाः हनीगु जूगु दु। अथे हे नेपाःया आदिवासी जनजातिय्सं नं थःगु हे कथं हाकुगु दिं हनीगु जूगु दु। नेवाः स्वायत्त राज्यया निंतिं आन्दोलन याना वयाच्वंगु मंकाः संघर्ष समितिया थौं सुथय् च्वंगु मुँज्याय् जेष्ठ १८ गते नेपालमण्डल बन्द यायेमाः व यायेम्वाः धकाः नेवाः न्ह्यलुवातय् दथुइ सहलह जूगु खः। क्वःछिनातःगु इलय् संविधान जारी मयाःगुया सांकेतिक विरोध नाप नापं धर्मनिरपेक्षता, संघीयता व गणतन्त्रयात सुनिश्चित यायेमाःगु, सहमतिया आधारय् अग्रगामीतय्गु मंकाः सरकार दयेकेमाःगु नापं संविधानसभायात रक्षा यायेमाःगु माग यानाः मंकाः संघर्ष समितिं आन्दोलन याना वयाच्वंगु दु। तत्कालीन अवस्थाय् २०५६ सालया जेष्ठ १८ गते सर्वोच्च अदालतं स्थानीय निकायसं स्थानीय मांभाय् छ्यले दइमखु धकाः फैसला याःगु खःसा अबलेनिसें हे नेवाःत नापं जनजातितय्सं जेष्ठ १८ गतेयात हाकुगु न्हि धकाः हना वयाच्वंगु खः ।