धर्मकीर्तिइ हस्तकला ब्वज्या
येँ (सन्ध्या टाइम्स)/धर्मकीर्ति बौद्ध अध्ययन गोष्ठीया ३९ क्वःगु बुदिंया लसताय् श्रीघः विहारय् म्हिगः शनिवाः मंकाः ब्वज्या जुल। उगु ब्वज्याय् हस्तकला प्रदर्शन याःगु खः ।
धर्मकीर्ति बौद्ध अध्ययन गोष्ठीया ग्वसालय् जूगु उगु मंकाः ब्वज्या ३९ प्वाः हे मत च्याकाः गोष्ठीया धम्मानुशासक भिक्षु अश्वघोष महास्थविरपाखें उलेज्या यानाबिज्याःगु खः। ब्वज्याय् धर्मकीर्ति अडियो भिज्युयल कमिटीपाखें निर्माण याःगु भिक्षु अश्वघोषया किपा बाखंया वृत्त चित्रया सिडी उलेज्या विहारया प्रमुख भिक्षुणी धम्मावतीपाखें यानाबिज्याःगु खः। उगु बृत्त चित्रया सम्पादक नापं निर्देशक भिक्षुणी पञ्ञावतः खःसा च्वमि व उद्घोषक व सह निर्देशक रीना तुलाधर खः। उगु वृत्तचित्र कर्मकीर्ति विहारया न्हापांगु प्रस्तुति खःसा सच्छि तका कयाः उगु वृत्तचित्र मीगु ज्या नं जूगु दु ।
हस्तकला, ज्वेलरी, फेस पेन्ट, फूड स्टल नापं बौद्ध अध्ययन गोष्ठीया थीथी एकाइया गतिविधि नं स्टलया रुपय् दुथ्याका म्हिगः न्हिछि हे मंकाः ब्वज्या याःगु खः। अथे हे धर्मकीर्ति बौद्ध अध्ययन गोष्ठीया ग्वसालय् हिदान तकं जूगु खः ।
