प्रमया अभिव्यक्ति भ्रमपूर्ण जूगु धासें एमालेया आपत्ति
नेकपा (एमालें) थःगु हे पार्टीया वरिष्ठ नेता नापं प्रधानमन्त्री माधवकुमार नेपालं संविधानसभाया विषयलय् बियादीगु अभिव्यक्ति भ्रमपूर्ण जूगु खँ धाःगु दु ।
प्रधानमन्त्री माधवकुमार नेपालं वंगु शुक्रवाः थः संविधानसभाया पक्षय् मदुगु व माओवादीयात लय्तायेकेत जक थःम्हं संविधानसभा स्वीकार यानागु धकाः बियादीगु अभिव्यक्तियात यक्व थासं कुंखिनेवं आइतवाः एमालें छगू प्रेस विज्ञप्ति पिथना जनसमुदाय व पार्टीलय् थुकीं भ्रम ब्वलंगु खँ धाःगु दु ।
एमाले सचिव युवाराज ज्ञवालीं पिथनादीगु विज्ञप्तिइ पार्टीया वरिष्ठ नेतापाखें वःगु अभिव्यक्तिं संविधानसभाया बारे पार्टीया दृष्टिकोण सम्बन्धय् भ्रम ब्वलनीगुलिं अज्याःगु भ्रम ब्वलंकेमबीत व पार्टीं यानावयाच्वंगु संस्थागत निर्णयया आधारय् न्ह्याः वनेत पार्टी पंक्ति व आम जनसमुदाययात इनाप याःगु दु ।
विज्ञप्तिइ संविधानसभाया माग माओवादीया जक मजुसें जनआन्दोलन-२लय् कुहांवःगु दक्वं राजनीतिक दलया एजेण्डा जूगु खँ नं न्ह्यथंनातःगु दु ।
