शान्ति व समृद्धिया निंतिं छप्पँ जुइत राष्ट्रपतिया इनाप
राष्ट्रपति डा. रामवरण यादवं दक्वं नेपाःमिपिंत लोकतन्त्र सहतिया दिगो शान्ति व समृद्धिया पक्षय् छप्पँ जुइत इनाप यानादीगु दु । नापं वय्कलं आपसी विश्वासया साथ सहमति व सहकार्यया लँपुइ न्ह्याः वनेत नं दक्वं नेपाःमियात इनाप यानादीगु दु ।
फम्पिइ च्वंगु विद्युतगृह सच्छि दँ क्यंगु लसताय् आइतवाः जूगु छगू ज्याझ्वया उल्लेज्या यनादिसें राष्ट्रपति यादवं राजनीतिक स्थायित्व कायम मजुगूलिं विकास निर्माण प्रकृयाय् देय् ल्यूने लाःगु धयादिसें लोकतान्त्रिक पद्धतियात संस्थागत रुपय् बल्लाकाः विकासया प्रतिफल आम नेपाःमि थाय् थ्यंकेगु ई वःगु धयादिल ।
ज्याझ्वलय् उर्जा मन्त्री डा. प्रकाशशरण महतं जलसम्पदा उपयोग यायेगु रणनीति अन्तर्गत नीन्याद्वः मेगावाट ऊर्जा उत्पादन यायेत नीदँया रणनीति तर्जुमा यानागु जानकारी बियादिसें जलविद्युत क्षेत्रय् स्वदेशी व विदेशी लगानीकर्ताया आकर्षण अप्वयाच्वंगु धयादिल । वय्कलं देशय् अनुकूल वातावरण तयार जुयाः लक्ष्य कथं ऊर्जा उत्पादन यायेफइगु विश्वास प्वंकादिल ।
ज्याझ्वः लिपा राष्ट्रपति यादवं विद्युतगहृया उत्पाद, सञ्चालन व सम्भार विभागया अवलोकन यानादीगु खः ।
