'म्याद थपया विषययात प्रमया राजीनामा नाप स्वायेमते'
संविधानसभाया म्याद थप यायेगु बारे सरकाराया नेतृत्व यानाच्वंगु नेकपा (एमाले) व एनेकपा (माओवादी) दथुइ आइतवाः सुथय् खँल्हाबंला जूगु दु । माओवादी अध्यक्ष पुष्पकमल दाहाल 'प्रचण्ड' निवास न्हू बजारय् जूगु खँल्हबंलाय् निगू दल दथुइ खँ मिले मजुइवं संविधानसभाया म्याद थप यायेगु विषय अन्यौलय् लाःगु दु ।
निगू दल दथुइया खँल्हाबंलाय् माओवादीं प्रधानमन्त्रीया राजीनामा लिपा जक संविधानसभाया म्याद थप यायेगु विषयलय् सहमति प्वंकेफइगु खँ धासें प्रधानमन्त्रीया राजीनामा व म्याद थप यायेगु बारे सहमति यानाः मेगू विषयलय् प्याकेजय् सहमति यायेमाःगु खँ तःगु खः ।
एमालें धाःसाः संविधानसभाया म्याद थप यायेगु विषययात प्रधानमन्त्रीया राजीनामा नाप मस्वायेत इनाप याःगु खः । निगू बिस्कं बिस्कं विषय जूगुलिं बिना र्सत संविधानसभाया म्याद थप यायेत माओवादी इनाप यासें वयां लिपा सहमतिय सरकारया लँपू चालीगु खँ धाःगु खः ।
एमाले अध्यक्ष झलनाथ खनालं संविधानसभा व प्रधानमन्त्रीया राजीनामा निगू बिस्कं खँ जूगु कनादिसें निगू विषययात स्वानाः मस्वायेत थःपिंसं बैठकय् माओवादीयात इनाप यानागु कनादिल ।
बैठकय् माओवादी अध्यक्ष प्रचण्ड, वरिष्ठ उपाध्यक्ष मोहन वैद्य 'किरण', उपाध्यक्षत डा. बाबुराम भट्टराई व नारायाणकाजी श्रेष्ठ 'प्रकाश' नापं एमाले पाखें अध्यक्ष झलनाथ खनाल, महासचिव इश्वर पोखरेल, सचिव प्रदीप ज्ञवाली व नेता भारतमोहन अधिकारी लगायत नेतातय् उपस्थिति दुगु खः ।
