जापानं न्हय्सः ल्याय्म्ह यंकीगु
नेपाःया भ्रमणय् वयाच्वंगु जापान इन्टरनेशनल ट्रेनिङ कर्पोरेशन अर्गनाइजेशनया (जित्को) उच्चस्तरीय प्रतिनिधि मण्डलं नेपाःया ७०० म्ह अर्धदक्ष नेपाली जनशक्तियात् जापानय् यंकाः शीप तालिम बीगु जूगु दु ।नेपाःया भ्रमणय् वयाच्वंगु उगु पुचलं थ्व सम्बन्धय् श्रम तथा यातायात व्यवस्था मन्त्री लेखराज भट्टलिसे सहलह यानादी धुंकूगु खँ सूत्रं धाःगु दु ।
जापानं दँय्दसं ७० हजारम्ह थीथी देया अर्धदक्ष ल्याय्म्हतय्त थुकथंया ट्रेनिङ बीगु याना वयाच्वंगु खःसा थ्व स्वयां न्ह्यः सन् २००३ य् जित्कों नेपाल उद्योग वाणिज्य महासंघयात अर्धदक्ष ल्याय्म्हत जापान छ्वया हयेगु जिम्मेवारी बिउगु खःसा थीथी कारण यानाः महासंघं अन ल्याय्म्हत छ्वये मफुगु खः । महासंघं न्हापा जापानय् मनूत छ्वये मफुगुलिं थ्व पालय् जित्को र्सार्वजनिक प्रस्ताव हे आह्वान याःगु खःसा उकी १५० गू संस्थां निवेदन तःगु खः ।
जापानं थीथी देय्या अर्धदक्ष जनशक्तियात स्वदँ तक टे्रनिङ बियाः सम्बन्धित क्षेत्रय् तुं ज्या याकेगु याना वयाच्वंगु खः । थथे थीथी देयय् अर्धदक्ष जनशक्तियात टे्रनिङ बीगु धाःसां नं चीनिया मूलयापिं जक अप्वया वयाच्वंगुलिं थुगुसी अर्गनाइजेशनया उच्चस्तरी प्रतिनिधि हे नेपाः वयाः नेपाःया ह्वःताः बीगु निंतिं विशेष पहल याःगु खँ नं सूत्रं धाःगु दु ।
जापान सरकारं नेपाःया थीथी गामय् 'वन भिलेज वन इण्डष्ट्री' दयेकेत नं ग्वाहालि यायेगु बिचाः यानाच्वंगु खँ सूत्रं धाःगु दु ।
