प्रधानमन्त्री जुजुवादी जूगु यादवया द्वपं
प्रमया अभिब्यक्ति संविधानसभा विरोधी : झिंन्यागू दल
मधेशी जनअधिकार फोरमया अध्यक्ष उपेन्द्र यादवं प्रधानमन्त्री माधवकुमार नेपालं थःम्ह संविधानसभा चाहेमजूगु धका: बियादीगु अभिव्यक्तियात जुजुवादीया द्वपं बियादीगु दु ।
बाराया काचोर्वाय् शनिवाः मधेस रक्षा दलया प्रतिरक्षा तालिम लिपाः जूगु ज्याझ्वलय् यादवं प्रधानमन्त्री नेपालं थः संविधानसभाया पक्षय् मदुगु धयाः जुजुवादी चरित्र क्यंगु धयादिसें प्रधानमन्त्री खलनायक जूगु धयादिल ।
यादवं उगु अभिव्यक्तिं प्रधानमन्त्रीं थ: संघीयता, लोकतान्त्रिक गणतन्त्र, धर्मनिरपेक्षा व समावेशीया विरोधी जूगु पुष्टि याःगु धयादिल । वय्कलं थंज्याःगु अभिव्यक्ति ब्यूम्ह मनू सरकार प्रमुखया कथं च्वनेमदइगु धयादिसें प्रधानमन्त्रीं राजीनामा बीमाःगु धयादिल ।
उखे संविधानसभाय् दुथ्याःगु झिंन्यागू चीचीधंगु दलया शनिवाः च्वंगु बैठकं प्रधानमन्त्रीया अभिव्यक्ति संविधानसभा विरोधी जूगु धासें वय्कलं नैतिकताया आधारय् माफी फ्वनेमाःगु खँ धाःगु दु ।
लुमंकेबहजु, प्रधानमन्त्री नेपालं शुक्रवाः थःम्हं संविधानसभा चाहेमजूगु धयादिसें माओवादीयात लय्तायेकेत जक थःम्हं संविधानसभायात स्वीकार यानागु अभिव्यक्ति बियादीगु खः ।
