'राष्ट्रिय सरकार गठनय् प्रतिबद्धता जुसा: म्याद थप'
वर्तमान सरकारं राजीनामा ब्यूसाः जक संविधानसभाया म्याद थप यायेगु र्शत तयाच्वंगु एनेकपा (माओवादीं) वर्तमान सरकार विघटन यानाः राष्ट्रिय सरकार गठन यायेगु प्रतिबद्धता प्वंकूसाः म्याद थप यायेत थःपिं तयार जुइगु खँ धाःगु दु ।
शनिवाः सुथय् माओवादी व नेपाली कांग्रेसा शीर्ष नेतात दथुइ जूगु खँल्हबंलाय् माओवादीं थुगु प्रस्ताव याःगु खः । माओवादीं पुलांगु अडानय् लचकता क्यनाः आः सरकार विघटनया प्रतिबद्धता जक जुसां संविधानसभाया म्याद थप यायेफइगु प्रस्ताव तःगु खः । तर उगु प्रस्तावयात नं कांग्रेसं अस्वीकार याःगु दु ।
कांग्रेस संसदीय दलया नेता रामचन्द्र पौडेलं संविधानसभा माओवादीया माग जूगु कनादिसें थुकीया म्याद थप यायेत उमिगु र्शत माने यायेमाःगु छुं कारण मदुगु कनादिल । वय्कलं माओवादीयात संविधानसभा थःपिनिगु माग मखु धकाः धायेत नं हाथ्या बियादिल ।
कांग्रेसं माओवादीया न्हूगु प्रस्ताव अस्वीकार यासें शान्ति प्रकृयाया क्वचायेकेगु सुनिश्चिता, राज्य पुनर्संरचना आयोग गठन यायेमाःगु लगायत पुलांगु हे अडान काःगु खः । बैठकय् न्हापा हे क्वःछिनातःगु खुगू बुँदे एजेण्डाय् नं सहलह जूगु खः । नापं निगू पक्ष दथुइ थप वार्ता यायेगु सहमति जूगु दु ।
बैठकय् माओवादी अध्यक्ष पुष्पकमल दाहाल 'प्रचण्ड', वरिष्ठ उपाध्यक्ष मोहन वैद्य 'किरण', उपाध्यक्षत डा. बाबुराम भट्टराई व नारायणकाजी श्रेष्ठ 'प्रकाश' नापं कांग्रेसया कार्यवहाक सभापति सुशील कोइराला, वरिष्ठ नेता शेरबहादुर देउवा, संसदीय दलया नेता रामचन्द्र पौडेल लगायत नेतातय् उपस्थिति दुगु खः ।
