म्याद थपे मजूसा छु जुइ?
नेता व संविधानविद्तय् बिचाः पात
[ ]
येँ (सन्ध्या टाइम्स)/यदि जेठ १४ गते संविधानसभाया म्याद थपे मजुल धाःसा संविधानसभा लगायत सरकार, प्रधानमन्त्री, राष्ट्रपति आदि निकायया अवस्था छु जुइ? थ्व विषयय् संविधान एवं कानूनविद् व राजनीतिक नेतातय् बिचाः तसकं हे पाःगु खने दया वःगु दु ।
सरकारय् च्वंपिं जक मखु विपक्षी नेता पुष्पकमल दाहाल 'प्रचण्डं' तकं म्याद थपे मयाःसां संविधानसभा भंग जुइ मखु, निष्क्रीय जक जुइ धयादीगु दु। तर संविधानविद् विपिन अधिकारीं धाःसा नेतातय् थ्व धापू पाय्छि मजू धयादीगु दु। कानून व संविधान कथं जेठ १४ लिपा संविधानसभा दइ मखु धासें वय्कलं राजनीतिक निर्णय यानाः म्याद फुइधुंकूगु संविधानसभायात हानं म्वाके ला जिउ तर थुकिं कानून व छगू संवैधानिक पद्धति कथं देश चले यायेगु प्रणालीया धाःसा तःधंगु हे उपहास जुइगु बिचाः प्वंकादीगु दु ।
अथे हे संविधानविद् डा. पूर्णमान शाक्यं नं १४ गते म्याद थपे मयात धाःसा संविधानसभाया औचित्य समाप्त जुइगु खँ कनादीगु दु ।
संविधानविद् अधिकारीया कथं म्याद थपे मयायेसातकि सरकार काम चलाउ जक जुइ तर राष्ट्रपति धाःसा कायम जुइ धयादिल। थ्व अवस्थाय् न्हूगु चुनावय् वनेगु हे छपु जक लँपु जुइ तर उकिया लागिं नं अन्तरिम संविधान हे संशोधन यायेमाली व संशोधनया लागिं संसद हे मदइगु जुयाः मुलुक 'असंवैधानिक पद्धतिया चक्र' य् लाः वनी धयादिल ।
उखे संविधानसभाया अध्यक्ष एवं कानूनविद् सुभाष नेम्वाङं नं जेठ १४ लिपा संविधानसभाया अवस्था थथे हे जुइ धाये फइ मखु धयादीगु दु। वय्कलं जेठ १४ गते लिपाया अवस्थायात वर्तमान अन्तरिम संविधानं छुं धयातःगु मदुगु जूगुलिं उगु इलय् छु जुइ धाये मफुगु बिचाः प्वंकादीगु दु ।
तर १४ गते म्याद तोके मयासे अथें त्वःता छ्वयेगु व छुं ई लिपा राजनीतिक सहमति जुल धकाः हानं संविधानसभा म्वाकेगु धइगु खँ कानुनी रुपं मिले मजूगु खँ नं भाजु अधिकारीं कनादिल ।
