कन्हय् येँनिसें यलय् तक जुलस
येँ (सन्ध्या टाइम्स)/नेवाः स्वायत्त राज्य मंकाः संघर्ष समितिया ग्वसालय् कन्हय् नेवाःतय्सं येँया रत्न पार्क शान्ति बाटिका लागांनिसें यलया मंगलय् तक विरोध जुलुस पिकाइगु जूगु दु। नेवाः स्वायत्त राज्यया सुनिश्चितता, संघीयता, धर्मनिरपेक्षतायात संस्थागत यायेमाःगु नापं थीथी कथंया माग यानाः थ्व जुलुस पिकायेत्यंगु खः। जुलुसय् नेवाः ख्यःया न्ह्यलुवा, भाषिक कार्यकर्ता, थीथी लागाय् च्वंगु मंकाः संघर्ष समिति समन्वय समितिया दुजः व मेमेपिंसं ब्वति कयादी। जुलुस कन्हय् सुथय् ७ बजे शुरु जुइगु खँ ग्वसाः खलकं धाःगु दु। कन्हय्या जुलुसया प्रचार यायेत थौं सनिलया ४ बजे नेवाः देय् गुथि नेपालमण्डलं थनया थाय्मरुइ छगू कोणसभा नं यायेत्यंगु दु ।
थ्वहे झ्वलय् नेवाःतय्सं थौं नेकपा (एमाले) या नायः झलनाथ खनालया छेँ डल्लुइ धर्ना बिउगु दु। धर्नाया झ्वलय् ज्ञापनपौ नं लःल्हाःगु खः। वंगु बुधवाः नेकां कार्यवाहक सभापति सुशिल कोइराला व म्हिगः माओवादीया अध्यक्ष प्रचण्डया छेँय् धर्ना च्वं वंगु खः ।
