संविधानसभाया म्याद थप यायेत नेम्वाङया इनाप

संविधानसभाया अध्यक्ष सुवाषचन्द्र नेम्वाङं संविधानसभाया म्याद थप यायेत राजनीतिक दलतय्त औपचारिक रुपं इनाप याःगु दु ।

नेम्वाङं शुक्रवाः छगू पत्रकार सम्मेलन यानाः राजनीतिक दलतय्त सहमतिया आधारय् संविधानसभाया म्याद थप यायेत इनाप यानादिल । वय्कलं जेठ १४ गतेया दुने संविधान जारी जुइफइगु अवस्था मदुगु धयादिसें थुकीया म्याद थप यायेगु विकल्प मदुगु धयादिल ।

वय्कलं सहमतिया आधारय् हे याकनं म्याद थप यायेमाःगु खँय् बः बियादिसें संविधानसभाया म्याद थपे मयासाः देशय् संकट वयेफइगु धयादिल । सहमतिया आधारय् खुलाः वा दच्छिया निंतिं संविधानसभाया म्याद तनेफइगु स्पष्ट यानादिसें नेम्वाङ राजनीतिक दलतय् दथुइ सहमति यानाः म्याद थप याःसा संविधान निर्माण जुइफइगु धयादिल ।