ल्याः किटान लिपा जक राष्ट्रिय सहमतिया सरकार : प्रम
प्रधानमन्त्री माधवकुमार नेपालं सुरक्षा निकायलय् समायोजन यायेगु माओवादी लडाकुया ल्याः किटान लिपा जक राष्ट्रिय सहमतिया सरकार गठन जुइफइगु खँ धयादीगु दु ।
छन्हुयंकया नेपाः भ्रमणय् झायादीम्ह नर्वेया वातावरण व अन्तर्राष्ट्रिय विकासमन्त्री इरिक सोल्हेम नापया खँल्हाबंलाय् प्रधानमन्त्री नेपालं राजनीतिक गतिरोध चीकेत थःगु पाखें फक्वः कुतः यानाच्वनाःगु धयादिसें समायोजन व पुनःस्थापना यायेगु माओवादीया लाडकुया ल्याः किटान यानाः वंसाः जक समस्या ज्यनीगु धयादिल । वय्कलं ल्याः किटान यायेफुसाः जक मेमेगू खँय् सहमति यायेफइगु व राष्ट्रिय सरकारया लँपु चालीगु धयादिल ।
पूर्व निर्धारित ज्याझ्वः कथं प्रधानमन्त्री नेपाल रौतहटय् नेपाः-भारत सीमाया पुलया उल्लेज्या यायेत उखे वनेत्यंगु इलय् त्रिभुवन विमानस्थलय् नर्वेली मन्त्री सोल्हेम नाप जूगु खँल्हाबंलाय् सोल्हेमं नेपाःया शान्ति प्रकृया व लिप्पांगु राजनीति अवस्थाया बारे च्यूताः प्वंकादीगु खः । उगु इलय् वय्कलं छुं नं हालतं शान्ति प्रकृया भंग जुइमज्यूगु बिचाः प्वंकादीगु खः ।
