सहमतिया निंतिं चीचीधंगु दलया दबाव
संविधानसभाय् दुथ्याःगु झिंछगू चीचीधंगु दलं राष्ट्रिय सहमतिया आधारय् संविधानसभाया म्याद थप यायेत स्वंगू प्रमुख दलयात इनाप याःगु दु । माओवादी, कांग्रेस व एमाले दथुइ सहमति जुइमफयाच्वंगु इलय् चीचीधंगु झिंछगू दलं दबाव बीगु निंतिं बिहीवाः स्वंगू दल सहितया बैठक आह्वान याःगु खः ।
बैठक लिपा चीचीधंगु दलं स्वंगू दलत दथुइ संविधानसभाया म्याद थप यायेत सहमति जुइगु खँय् आशावादी जूगु खँ धाःगु दु । स्वंगू प्रमुख दलं प्याकेजय् सहमति यायेगु नांमय् संविधानसभा भंग जुइगु अवस्था वःगु बारे चीचीधंगु दलं ध्यानाकर्षण याकूगु खः ।
स्वंगू दल दथुइ प्याकेजय् सहमति यायेत जुयाच्वंगु वार्ताय् सेना समायोजनया खँय् सहमति जुइमफुगु सीदुगु खँ राष्ट्रिय जनशक्ति पार्टीया उपाध्यक्ष डा. प्रकाशचन्द्र लोहनीं कनादिल । वय्कलं दक्व दलत राष्ट्रिय सहमतिया आधारय् संविधानसभाया म्याद थप यायेमाःगु खँ सहमति दुगु कनादिल ।
बैठय् स्वंगू तःधंगु दलया नेतात नापं राष्ट्रिय प्रजातन्त्र पार्टी, राष्ट्रिय जनशक्ति पार्टी, नेकपा संयुक्त लागायत चीचीधंगु झिंछगू दलया ब्वति दुगु खः ।
