नेवाः आन्दोलनप्रति ऐक्यबद्धता: माओवादी
येँ (सन्ध्या टाइम्स)/नेवाः स्वायत्त राज्यया सुनिश्चितता नापं संविधानसभाया रक्षा यायेमाःगु माग यासें थौं सुथय् माओवादी अध्यक्ष प्रचण्डया छेँय् च्वंगु धर्नाया झ्वलय् एकीकृत माओवादीया वरिष्ठ नेता मोहन बैद्य किरणं नेवाः आन्दोलनप्रति थःपिनि पार्टीया ऐक्यबद्धता दु धयादिल।
वय्कलं आःया अवस्थाय् दलतय् दथुइ सहमति मजुयाच्वंगु धाथेंया कारण धइगु संघीयता, नेवाः नापं आदिवासी जनजाति, मधेशीतय्सं ल्ह्वनाच्वंगु मुद्दा खः धासें नेवाःतय्सं गुगु कथं दवाव बीगु ज्या यात व सुथां लायेमा धकाः भिंतुना बियादिल ।
नेवाः स्वायत्त राज्य मंकाः संघर्ष समितिया ग्वसालय् जूगु उगु ज्याझ्वलय् नेता किरणयात संघर्ष समितिया वर्तमान नायः नरेशवीर शाक्यं छगू ज्ञापनपत्र नं लःल्हानादीगु खः। थौंकन्हय् प्रचण्ड धौख्यलय् दीगुलिं उपाध्यक्ष किरणं उगु ज्ञापनपत्र लःल्हानाः कयादीगु खः। ज्याझ्वलय् मंकाः संघर्ष समितिइ दुथ्याःगु थीथी खलः पुचः नापं लागा लागाया समन्वय् समितिया दुजःपिंसं सक्रिय रुपं ब्वति कयादीगु खः ।
