जनजातितपाखें १० गते धर्ना

येँ (सन्ध्या टाइम्स)/नेपाःया आदिवासी जनजातितय् हक अधिकारया नितिं आन्दोलन यायेत माःगु गृहकार्य यायेगु भाला कयातःगु कार्यदलया म्हिगः मुँज्या च्वनाः आः थ्वहे वइगु १० गते माओवादी, नेपाली कांग्रेस व एमालेया केन्द्रीय ज्याकुथिइ धर्ना च्वनेगु निर्णय याःगु दु। अन्तरिम संविधानय् सुनिश्चित यानातःगु संघीयता, धर्मनिरपेक्षता व गणतन्त्रयात संस्थागत यायेमाःगु, राज्य पुनर्संरचना जाति, भाषा व क्षेत्रया आधारय् यायेमाःगु माग यासें आःया अवस्थाय् आदिवासी जनजातितय्सं आन्दोलन हे यायेमाःगु ठहर यानाः उगु ज्याझ्वः पित बिउगु खः। अथे हे वइगु शुक्रवाः कार्यदलय् दुथ्याःगु प्यंगू मोर्चाया मंकाः मुँज्या च्वनाः माःगु कथं न्हूगु आन्दोलनया ज्याझ्वः तयार यानाः शनिवाः हे पत्रकार सम्मेलनया माध्यमं सार्वजनिक यायेगु तयारी याःगु दु ।