नेपालभाषा ब्वनीपिं म्हो जूगुलिं चिउताः
यल (सन्ध्या टाइम्स)/नेपालभाषा केन्द्रीय विभागया ग्वसालय् थौं सुथय् नेपालभाषा ख्यःया न्ह्यलुवा व नेवाः संचारकर्मीतय् दथुइ सहलह मुँज्या जुल ।
नेपालभाषा विषय कयाः ब्वनाच्वंपिं विद्यार्थीत न्हियान्हिथं म्हो जुजुं वनाच्वंगु खँय् चिउताः प्वंकुसें उगु ज्याझ्वः जूगु खः। ज्याझ्वलय् नेपालभाषा केन्द्रीय विभागया प्रमुख प्रा. प्रेमशान्ति तुलाधरं वइगु असार १ गतेनिसें न्ह्याइगु नेपालभाषा एम.ए. तगिंया न्हूगु भर्नाया नितिं नेपालभाषा साहित्य, संस्कृति, लोकवार्ता, समाज, भाषा शिक्षण लगायतया विषयत दुथ्याकेगु जानकारी बियादिल ।
विभागयात नेवाः अध्ययन केन्द्र दयेकेगु नापं थीथी कथं आर्थिक श्रोत चूलाकाः थीथी श्रोत ग्रन्थ तयार याकेगु व नेवाः संस्कृतियात च्वन्ह्याकेगु निंतिं विभागपाखें थीथी गतिविधि याना वनेगु जानकारी नं मुँज्या बिल। ज्याझ्वलय् न्हूगु भर्नाया निंतिं आर्थिक श्रोत चूलाकेगु, विज्ञापन ब्यानर प्रायोजन यायेगु नापं प्रचार प्रसार यायेगु खँय् सहलह जूगु खः। लुमंकेबहः जू थौंकन्हय् नेपालभाषा एम.ए. तगिंया न्हापांगु दँय् नीन्याम्ह व निगूगु दँय् झिंखुम्ह विद्यार्थीत ब्वनाच्वंगु दु ।
